Tuesday , 21 November 2017

Skandaloze: Trukimi në futbollin kosovar, dëgjojeni bisedën e gjyqtarëve me trajnerin e njohur (Video)


Futbolli kosovar po del të jetë i përfshirë nga dallaveret dhe trukimet e ndeshjeve.

Dyshimet e qarta u regjistruan në javën që e lam pas ku ndeshjet Ferronikeli-Drenica dhe Besa-Trepça flitej se ishin të kurdisura pasi që shumë baste janë luajtur paraprakisht që dy skuadrat të humbnin ndeshjen, anipse ishin superfavorite.

Por, skandali po del të ketë burim edhe më të thellë dhe se është i kahmotshëm. Indeksonline ka siguruar video ku shihen dhe dëgjohen akterë të futbollit kosovar duke folur për ndeshjet e manipuluara.

Në video shihet trajneri i famshëm kosovar, Ismet Munishi në takim me gjyqtarin kosovar, Bajram Gashin, gjyqtarin anësor, Edmond Zeqirin dhe vëzhguesin Ali Ajeti ku temë diskutimi kishin dallaveret që janë bërë e po bëhen në futbollin kosovar.

Gjyqtari Bajram Gashi tregon se si e kishte ndihmuar edicionin e kaluar Dritën që ta mposhtë Prishtinën pas më shumë se 10 vitesh.

Ai tregon se si kishte ndërhyrë direkt në rezultat me vendimet e tij. Gashi poashtu tregon një thirrje që i ishte bëri edicionin e kaluar për ta mposhtur Prishtinën, shërbim të cilin e kishte kryer pa asnjë cent bakshish.

Temë diskutimi ishte edhe ndeshja e neserme ku Gashi pritet të jetë gjyqtar kryesor në ndeshjen Drita-Prishtina, ndeshja e rregullt në Superligën e Kosovës në futboll.

Gjyqtari Gashi e merr “aminin” e vëzhguesit, Ali Ajeti i cili e garanton Munishin se do ta ketë përkrahjen e tyre deri në fund të edicionit në synimin për ta mbajtur Dritën në ligë.

Ky video inçizim do të vazhdoj nesër me pjesën tjetër ku zbulohen edhe detaje tjera nga dallaveret në futbollin e Kosovës./Indeksonline/